«Қазақстан халқына» Қоғамдық қорының Қамқоршылық кеңесі «Трилекса» және «Трилекса Педиатрико» дәрілік заттарын Қор қаражаты есебінен қаржыландырылатын дәрі-дәрмектер тізімінен алып тастау туралы шешім қабылдады.
Аталған препараттар сирек кездесетін тұқым қуалайтын ауру – муковисцидозбен ауыратын 40 науқасты дәрі-дәрмекпен қамтамасыз ету мақсатында қолданылып келген болатын. Алайда, белгілі болғандай, «Трилекса» және «Трилекса Педиатрико» препараттары VERTEX PHARMACEUTICALS INCORPORATED компаниясы әзірлеген түпнұсқа «Трикафта» препаратының дженериктері болып табылады.
Қазіргі таңда осы препараттарды жеткізуші – «Galaxy International» ЖШС-ға қатысты сот ісі қаралуда. Талапкер – VERTEX компаниясы, Еуразиялық №039280 патенттің бұзылғанын мәлімдеп, құрамында элексакафтор бар препараттарды олардың рұқсатынсыз әкелуге және сатуға тыйым салуды талап етіп отыр.
Бірінші инстанциядағы сот VERTEX-тің талабын қанағаттандырып, «Galaxy International» ЖШС-нің әрекеттерін айрықша құқық бұзу деп танып, аталған препараттарды сатуға тыйым салу туралы шешім шығарды. Бұл шешім әзірге заңды күшіне енген жоқ және апелляциялық шағым берілді. Алайда, сот даулары жалғасып жатқан жағдайда, Қордың осы препараттарды сатып алуды әрі қарай қаржыландыруы елеулі заңдық, қаржылық және беделдік тәуекелдерді туындатуда.
Сонымен қатар, VERTEX компаниясының түпнұсқа препараттары дженериктерге қарағанда бірнеше есе қымбат. Мысалы, «Трилекса» препаратымен бір науқасты емдеу құны жылына 56,8 миллион теңгені құрайды, ал ашық дереккөздерден алынған мәліметтер бойынша «Трикафта» препаратының шетелдегі бағасы бір науқас үшін жылына 300 000 АҚШ долларына дейін жетеді. 40 науқасты емдеуге арналған Қордың жылдық бюджеті шамамен 2 миллиард теңгені құрайды және түпнұсқа препараттарды бюджеттен айтарлықтай асып кетпейтіндей етіп сатып алуға мүмкіндік бермейді.
